សមាជិកព្រឹទ្ធសភាសហរដ្ឋអាមេរិកទាំង ១០០រូប ត្រូវបានអញ្ជើញមកកាន់សេតវិមានប្រធានាធិបតីនៅថ្ងៃពុធស្អែក ដើម្បីពន្យល់ដោយសង្ខេបអំពីព័ត៌មានសំងាត់នានា ដែលពាក់ព័ន្ធជាពិសេសជាមួយនឹងបញ្ហាកូរ៉េខាងជើង។ នេះបើយោងតាមការប្រកាសឲ្យដឹងរបស់រដ្ឋបាលប្រធានាធិបតី កាលពីថ្ងៃចន្ទម្សិលមិញ។
ការពន្យល់ដោយសង្ខេបអំពីព័ត៌មានសំងាត់នានានេះ នឹងធ្វើឡើងដោយរដ្ឋមន្ត្រីការពារជាតិ លោក Jim Mattis រដ្ឋមន្ត្រីការបរទេស លោក Rex Tillerson ប្រធានទីភ្នាក់ងារជាតិស៊ើបការណ៍សំងាត់ លោក Dan Coats និងប្រធាននាយអគ្គសេនាធិការចម្រុះ លោកឧត្តមសេនីយ Joe Dunford។
ជាទូទៅ ការពន្យល់ដោយសង្ខេបអំពីព័ត៌មានសំងាត់នានានេះ ធ្វើឡើងនៅឯអាគារសភា ដែលកម្រធ្វើឡើងនៅឯសេតវិមានប្រធានាធិបតីណាស់។ មួយវិញទៀត ការចូលរួមរបស់សមាជិកព្រឹទ្ធសភាទាំងអស់នៅក្នុងការពន្យល់ដោយសង្ខេបអំពីព័ត៌មានសំងាត់នេះ ក្នុងពេលតែមួយ ក៏ជារឿងដ៏កម្រដែរ។
ក្នុងអំឡុងពេលពិសាអាហារថ្ងៃត្រង់ជាមួយនឹងអគ្គរដ្ឋទូតនានានៃប្រទេសជាសមាជិកក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃចន្ទម្សិលមិញ លោកប្រធានាធិបតី Donald Trump បានហៅ «ស្ថានការណ៍បច្ចុប្បន្ននៅក្នុងប្រទេសកូរ៉េខាងជើង» ថាជាស្ថានការណ៍ ដែលមិនអាចទទួលយកបាននោះទេ។
លោក Trump បានបញ្ជាក់ថា ក្រុមប្រឹក្សាសន្តិសុខអង្គការសហប្រជាជាតិ ត្រូវតែត្រៀមខ្លួន ដើម្បីដាក់ទណ្ឌកម្មខ្លាំងក្លាជាងមុនបន្ថែមទៀត លើកម្មវិធីនុយក្លេអ៊ែរ និងគ្រាប់ផ្លោងមីស៊ីលរបស់កូរ៉េខាងជើង៕
25 មេសា 2017
Aucun commentaire:
Enregistrer un commentaire