ភ្នំពេញៈ ការគ្រប់គ្រងមូលធនរបស់រដ្ឋាភិបាលចិន ដែលបានដាក់ចេញកាលពីខែវិច្ឆិកា ដោយធនាគារកណ្ដាល ដោយត្រួតពិនិត្យយ៉ាងប្រុងប្រយ័ត្នលើការដកប្រាក់ចេញពីប្រទេស ដែលរួមមានការវិនិយោគនៅបរទេស ការផ្ទេរប្រាក់នៅក្រៅប្រទេសក្នុងចំនួនច្រើន និងការទិញរូបិយប័ណ្ណបរទេសជាបុគ្គល បានបង្កើតឲ្យមានភាពមិនច្បាស់លាស់នៅកម្ពុជា។ នេះបើយោងតាមក្រុមអ្នកវិភាគផ្នែកច្បាប់នៅក្នុងប្រទេសកម្ពុជា។
ការគ្រប់គ្រងមូលធន ដែលកំពុងត្រូវបានប្រើប្រាស់ ដោយរដ្ឋាភិបាលចិនក្នុងការបង្កើនទុនបម្រុងរូបិយប័ណ្ណបរទេស និង ដើម្បីគាំទ្រតម្លៃរូបិយប័ណ្ណយន់ក្នុងគ្រាដែលសេដ្ឋកិច្ចធ្លាក់ចុះ និងការបង្កើនចរាចរណ៍មូលធន ត្រូវបានរិះគន់យ៉ាងខ្លាំង ដោយសារការមិនពេញចិត្តដោយក្រុមវិនិយោគិនចិនដីគោកដែលស្វែងរកការវិនិយោគរួមនៅក្រៅប្រទេស។
ការរឹតបន្តឹងនេះនឹងធ្វើឡើងទៅលើរាល់អាជីវកម្មដែលព្យាយាមយកប្រាក់ចេញចាប់ពី ៥ លានដុល្លារឡើងទៅ ឬ ៥០ ០០០ ដុល្លារសម្រាប់បុគ្គល។
ខណៈទំហំនៃផលប៉ះពាល់ដល់ប្រទេសកម្ពុជា មិនត្រូវបានគេដឹង ដោយសារតែមិនមានចំនួនសរុបជាផ្លូវការនៃការវិនិយោគវិស័យឯកជនពីប្រទេសចិន ដីគោកប្រចាំត្រីមាស គម្រោងអភិវឌ្ឍអចលនទ្រព្យដោយក្រុមហ៊ុន Guangzhou R & F Properties ដែលប្រកាសគ្រោងនឹងវិនិយោគ៣ពាន់លានដុល្លារលើសណ្ឋាគារប្រណីតថ្មីនៅក្នុងប្រទេសកម្ពុជាត្រូវបានគេមើលឃើញថាជាករណីមួយ។
លោក Zhang Li ស្ថាបនិក និងសហប្រធានរបស់ក្រុមហ៊ុនដែលចុះបញ្ជីនៅផ្សារហ៊ុនហុងកុងមួយនេះបានត្អូញត្អែរជាសាធារណៈពីរខែកន្លងមកហើយ ដោយថ្លែងថា៖«ការគ្រប់គ្រងមូលធនបច្ចុប្បន្នតឹងតែងខ្លាំងពេក» ខណៈលោកបានប្ដេជ្ញាថា នឹងបញ្ជូនប្រាក់ចំណេញបានពីការអភិវឌ្ឍនេះត្រឡប់ទៅប្រទេសចិនវិញ។
ក្រុមអ្នកវិភាគផ្នែកច្បាប់បានយល់ស្របថា ការថ្លែងយ៉ាងទូលំទូលាយនេះ មានការផ្លាស់ប្តូរក្នុងទំនុកចិត្តវិនិយោគិន ជាមួយនឹងការប្រុងប្រយ័ត្នជាទូទៅ។
អ្នកស្រី Jiajia Xing នាយកជាន់ខ្ពស់ក្រុមហ៊ុនច្បាប់កម្ពុជា Sok Xing and Hwang បានឲ្យដឹងថា ច្បាស់ណាស់ថា ការរឹតបន្តឹងនេះបានរារាំងដល់ប្រតិបត្តិការនៅក្នុងប្រទេសកម្ពុជា។
អ្នកស្រីថ្លែងថា៖ «ចាស ពួកគេត្រូវបានរារាំង»។ អ្នកស្រីបន្ថែមថា អ្នកស្រីមិនអាចបង្ហាញក្រុមហ៊ុនជាក់លាក់ដែលត្រូវបានរងផលប៉ះពាល់ទេ ព្រោះវាជាកិច្ចព្រមព្រៀងសម្ងាត់ ដែលចងភ្ជាប់ផ្នែកច្បាប់។
ប៉ុន្តែ អ្នកស្រីបានបញ្ជាក់ថា ការវិនិយោគរបស់ប្រទេសចិនមួយចំនួនមានភាពច្រណែនគ្នាខ្លាំងពេកក្នុងការចាប់ផ្ដើម ជាមួយគ្នា។
អ្នកស្រីលើកឡើងថា៖ «តាមទស្សនៈរបស់ខ្ញុំ គម្រោងទាំងនេះចាំបាច់ត្រូវធ្វើផែនការព្យាករកាន់តែប្រុងប្រយ័ត្ន និងសិក្សាលទ្ធភាពមុនពេលគម្រោងទាំងនេះត្រូវបានចាប់ផ្ដើមដំណើរការ»។
ខណៈដែលអ្នកស្រីបញ្ជាក់ថា ការវិនិយោគជារួមពីប្រទេសចិនមកកម្ពុជាកំពុងកើនឡើង រដ្ឋាភិបាលរបស់ប្រទេសចិនគ្រាន់តែធ្វើឲ្យប្រាកដថា៖«ការវិនិយោគក្រៅប្រទេសនឹងត្រូវបានធ្វើឡើងនៅក្នុងលក្ខណៈល្អប្រសើរ និងត្រឹមត្រូវតាមច្បាប់»។
អ្នកស្រីថ្លែងថា៖ «ខ្ញុំបានមើលឃើញរយៈពេលខ្លីថា ច្បាប់ និងបទប្បញ្ញត្តិដែលជាប់ពាក់ព័ន្ធ មានភាពប្រុងប្រយ័ត្នកាន់តែខ្លាំង ហើយអនុវត្តយ៉ាងតឹងរ៉ឹងជាងមុនដោយនិយតករចិន»។
ប៉ុន្តែលោក Robin Teow អ្នកប្រឹក្សាយោបល់ជាន់ខ្ពស់នៅក្រុមហ៊ុន DFDL Cambodia និងជាសហប្រធានក្រុមហ៊ុន China desk មានការជំទាស់ខ្លាំង ដោយនិយាយថា ការគ្រប់គ្រងមូលធនបានប៉ះពាល់អវិជ្ជមានដល់ទំនុកចិត្តរបស់វិនិយោគិន។
លោកថ្លែងថា៖«ការគ្រប់គ្រងមូលធននៅពេលថ្មីៗ ជាពិសេសបើទំហំដែលការគ្រប់គ្រងដូចនោះនឹងបន្ត បានបង្កឲ្យមានភាពមិនច្បាស់លាស់ក្នុងចំណោមក្រុមវិនិយោគិនជនជាតិចិន និងសមាសភាគីបរទេសរបស់ពួកគេដូចគ្នា»។
លោកបន្តថា៖ «នៅក្នុងប្រទេសចិន ដែលមានគោលនយោបាយជាក់លាក់ និងគោលការណ៍ណែនាំផ្លូវការ ជាធម្មតាត្រូវបានប្រើពាក្យយ៉ាងទូលំទូលាយ ហើយអាជ្ញាធរប្រទេសចិនមានការប្រុងប្រយ័ត្នដ៏ធំនៅក្នុងការអនុវត្តទិសដៅគោលនយោបាយមួយករណីម្ដងៗ»។
ជាលទ្ធផល លោកឲ្យដឹងថា ក្រុមវិនិយោគិនរបស់ចិនកំពុងប្រឈមនឹងពន្យារពេលក្នុងការទទួលបានហិរញ្ញប្បទានសម្រាប់ការខិតខំប្រឹងប្រែងនៅក្រៅប្រទេស និងការទទួលការបញ្ជាក់របស់និយតករពីអាជ្ញាធររបស់ប្រទេសចិន ដែលនាំឲ្យកិច្ចព្រមព្រៀងកម្រិតខ្ពស់ត្រូវបានបោះបង់ចោលទាំងស្រុង។
លោកបានបន្តថា៖ «ចំនួនកិច្ចព្រមព្រៀងដែលបោះបង់ចោលនឹងកើនឡើងផងដែរ ដោយសារតែការបរាជ័យរបស់ក្រុមវិនិយោគិនរបស់ប្រទេសចិនក្នុងការទទួលបានប្រាក់ដើម្បីចំណាយសម្រាប់កិច្ចព្រមព្រៀងក្នុងចំណោម ភាគីចិន ឬភាគីបរទេសក្នុងការចូលរួមការពិភាក្សាពាណិជ្ជកម្មយ៉ាងហ្មត់ចត់ណាមួយជាមួយភាគីចិន»។
លោកបានបន្ថែមថា តួលេខបានពីក្រសួងពាណិជ្ជកម្មចិនបង្ហាញថារបៀបនៃការរឹតបន្តឹងលើការគ្រប់គ្រងមូលធនបានប៉ះពាល់ដល់ការវិនិយោគនៅក្រៅប្រទេស។
ក្នុងអំឡុងត្រីមាសទី១ឆ្នាំនេះ ការវិនិយោគផ្ទាល់បានធ្លាក់ចុះជិត៤៩ភាគរយបើធៀបទៅនឹងរយៈពេលដូចគ្នា កាលពីឆ្នាំមុនមកនៅត្រឹម២០,៥ពាន់លានដុល្លារ។ ខណៈនៅក្នុងខែមីនាតែមួយការវិនិយោគនៅក្រៅបានធ្លាក់ចុះ៣០ភាគរយធៀបនឹងរយៈពេលដូចគ្នាកាលពីឆ្នាំមុនមកនៅត្រឹម៧,១ពាន់លានដុល្លារ។
លោកថ្លែងថា៖ «ជាលទ្ធផល យើងកំពុងមើលឃើញយ៉ាងច្បាស់ការធ្លាក់ចុះនៃនិន្នាការទិញឆ្លងកាត់ព្រំដែនរបស់ប្រទេសចិន ដោយសារតែការគ្រប់គ្រងមូលធនកាន់តែតឹងរ៉ឹង»។
លោកបានបន្តថា៖ «ប៉ុន្តែយើងនៅតែទទួលបានការសាកសួរជាច្រើនពីក្រុមវិនិយោគិនចិនអំពីការវិនិយោគដ៏មានសក្ដានុពលនៅកម្ពុជា ទោះបីជាការវិនិយោគមួយចំនួនអាចត្រូវការពេលវេលាមួយរយៈដើម្បីទទួលបានការទាក់ទាញក៏ដោយ»។
លោក Teow បានបន្ថែមថា ខណៈអាជ្ញាធរប្រទេសចិនបានប្រកាសយ៉ាងស្ងៀមស្ងាត់នូវ «បញ្ជីអវិជ្ជមាន» របស់វិស័យជាច្រើន ដែលសហគ្រាសគ្រប់គ្រងដោយរដ្ឋនឹងត្រូវបានហាមឃាត់មិនឲ្យវិនិយោគ ការប្រកាសនេះមិនត្រូវបានផ្សព្វផ្សាយយ៉ាងទូលំទូលាយដល់ក្រុមវិនិយោគឯកជននោះទេ។ ប៉ុន្តែ លោកបញ្ជាក់ថា ជំនឿជាទូទៅនៅពេលបច្ចុប្បន្នគឺថា ការវិនិយោគនៅក្នុងវិស័យជាច្រើនដូចជាអចលនទ្រព្យ ប្រេង រ៉ែ សណ្ឋាគារ ឬអ្វីៗដែលទាក់ទងនឹងបដិសណ្ឋារកិច្ចនឹងលែងមានការកម្រិត។
ទោះបីជាការបង្ក្រាបលើការវិនិយោគនៅក្រៅប្រទេសក៏ដោយ ក៏លោក Joseph Lovell ដៃគូក្រុមហ៊ុនច្បាប់ប្រចាំតំបន់ Sciaroni and Associates បានឲ្យដឹងថា ដោយមានឋានៈអនុគ្រោះរបស់ប្រទេសកម្ពុជាស្ថិតក្រោមគោលនយោបាយខ្សែក្រវាត់មួយ ផ្លូវមួយរបស់ប្រទេសចិន ព្រមទាំងវាជាទ្រព្យសកម្មភូមិសាស្ដ្រនយោបាយ ប្រទេសកម្ពុជាអាចប៉ះពាល់តិចតួចប៉ុណ្ណោះ។
លោកថ្លែងថា៖ «ជាទូទៅ ទីផ្សារកាន់តែតូច ត្រូវបានរំពឹងថានឹងមានបញ្ហាជាមួយប្រាក់ ប៉ុន្តែដោយសារតែការវិនិយោគនៅក្នុងប្រទេសកម្ពុជានៅពេលបច្ចុប្បន្នបានគាំទ្រដោយទីក្រុងប៉េកាំង ដែលរួមមានគោលនយោបាយខ្សែក្រវាត់មួយ ផ្លូវមួយ ហើយផ្ដោតការយកចិត្តទុកដាក់លើប្រទេសកម្ពុជា និងឡាវ ជាកន្លែងដ៏មានឥទ្ធិពលនៅក្នុងអាស៊ាន ក្រុមវិនិយោគិនចិនអាចស្វែងរកវាកាន់តែងាយស្រួលក្នុងការទទួលបានការយល់ព្រមសម្រាប់ការវិនិយោគនៅទីនេះជាងការនិយាយពីប្រទេសប្រេស៊ីល និងស៊ុយអែត ខណៈទីផ្សារកាន់តែធំមិនខ្លាំងដូចប្រទេសកម្ពុជាទេនៅក្នុងទិសដៅគ្រប់គ្រងគោលនយោបាយ»។
ប៉ុន្តែ ទាំងលោក Lovell និងលោក Teow បានយល់ថា មានមធ្យោបាយផ្លូវច្បាប់ងាយស្រួលក្នុងការចៀសវាងពីកណ្ដាប់ដៃដែកនៃការត្រួតពិនិត្យរបស់រដ្ឋាភិបាលចិនសម្រាប់ការវិនិយោគនៅក្រៅប្រទេស ដែលត្រូវបានត្រួតពិនិត្យដោយរដ្ឋបាលរដ្ឋសម្រាប់ទុនបម្រុងបរទេស(SAFE)នោះ។
លោក Lovell ថ្លែងថា៖«មធ្យោបាយផ្លូវច្បាប់ងាយស្រួលបំផុតក្នុងការធ្វើការងារ និងការគ្រប់គ្រង គឺត្រូវបញ្ចេញមូលធនដែលមាននៅក្រៅប្រទេសចិនស្រាប់»។
លោកបន្ថែមថា ប្រជាជនចិនជាទូទៅអាចចរាចរណ៍មូលធនវិនិយោគបរទេសដោយចាំបាច់ទទួលបានការយល់ព្រមពី SAFE។
ទោះបីមានការព្រមានទាំងក្រុមវិនិយោគិនចិនដែលស្វែងរកការវិនិយោគនៅក្នុងប្រទេសកម្ពុជាក៏ដោយ ប្រសិនបើការវិនិយោគស្របជាមួយនឹងគោលនយោបាយខ្សែក្រវាត់មួយ ផ្លូវមួយ លោក Lovell លើកឡើងថា លំហូរចូលហិរញ្ញប្បទានអាចយកឈ្នះលើឧបសគ្គនយោបាយបាន។ លោកលើកឡើងថា៖ «បទប្បញ្ញត្តិការគ្រប់គ្រងលើទុនបម្រុងរបស់ប្រទេសចិនមានភាពស្មុគស្មាញគួរសម»។
លោកបន្ថែមថា SAFE អាចបន្ធូរបន្ថយ ឬរឹតបន្តឹងការគ្រប់គ្រងរបស់ខ្លួននៅពេលណាមួយ។
លោកបានបន្តទៀតថា៖«ការបន្ធូរបន្ថយឬការរឹតបន្តឹងនេះជាទូទៅអាស្រ័យលើគោលនយោបាយរបស់រដ្ឋាភិបាលនៅពេលវេលាណាមួយ ហើយនិន្នាការដូចនោះនឹងផ្លាស់ប្តូរឆ្ពោះទៅរកការបន្ធូរបន្ថយ ឬការរឹតបន្តឹងដែលអាស្រ័យលើនិន្នាការគោលនយោបាយ»៕
Fri, 23 June 2017
Aucun commentaire:
Enregistrer un commentaire