ក្រុងបាងកក: យោងតាមប្រភពព័ត៌មានពីយោធាបានឲ្យដឹងថា រថក្រោះអ៊ុយក្រែន ៥ គ្រឿងទៀតនឹងត្រូវបញ្ជូនមកដល់ថៃនៅចុងខែនេះ ខណៈរហូតមកទល់ពេលនេះ កងភូមិន្ទថៃបានទទួលរថក្រោះ ធុនT84 Oplot ផលិតនៅអ៊ុយក្រែន ៣១ គ្រឿងហើយនោះ។
អ៊ុយក្រែន បានជាប់កិច្ចសន្យាផ្គត់ផ្គង់រថក្រោះធុន T84 Oplot ៤៩ គ្រឿងដែលគិតជាទឹកប្រាក់ចំនួន ៧,២ ពាន់លានបាតក្នុងឆ្នាំ ២០១១ ប៉ុន្តែមាន ការយឺតយ៉ាវក្នុងការដំណើរការផលិត និងការប្រគល់ជូនដោយសារបញ្ហាសន្តិសុខនៅក្នុងប្រទេសនេះ។
យោងតាមប្រភពព័ត៌មាននោះបានឲ្យដឹងថា កន្លងមក រថក្រោះផលិតនៅអ៊ុយក្រែន ៣១ គ្រឿង ត្រូវបានបញ្ជូនមកដល់ប្រទេសថៃ និងរថក្រោះ ៥ គ្រឿងទៀត ពេលនេះ កំពុងត្រូវបានបញ្ជូនទៅកាន់ប្រទេសនេះ ដោយដឹកជញ្ជូនតាមផ្លូវកប៉ាល់ ហើយត្រូវបានគេរំពឹងថា នឹងទៅដល់ប្រទេសថៃនៅ ចុងខែវិច្ឆិកានេះ។
រថក្រោះ ១៣ គ្រឿងទៀត ត្រូវបានផលិតរួចជាស្រេច ហើយពេលនេះអ៊ុយក្រែន កំពុងរង់ចាំក្រុមគណៈប្រតិភូយោធាមួយក្រុមធ្វើដំណើរទៅទីនោះ ដើម្បីត្រួតពិនិត្យមើលរថក្រោះទាំងនោះ នាចុងខែនេះ។
ក្នុងអំឡុងពិធីតាំងពិព័រណ៍ការពារជាតិ និងសន្តិសុខក្នុងឆ្នាំ ២០១៧ នៅក្រុងបាងកកកាលពីថ្ងៃចន្ទមុន ឧបនាយករដ្ឋមន្ត្រី និងជារដ្ឋមន្ត្រីការពារជាតិលោក Prawit Wongsuwan ជួបប្រជុំជាមួយរដ្ឋមន្ត្រីការពារជាតិអ៊ុយក្រែនលោក Stepan Poltorak និងរដ្ឋមន្ត្រីបានជូនដំណឹងលោក Prawit អំពីដំណើរការប្រគល់រថក្រោះទាំងនោះ៕
Mon, 13 November 2017
Aucun commentaire:
Enregistrer un commentaire