សមាជិក​សភា​អូស្ត្រាលី​ស្នើ​រដ្ឋាភិបាល​អូស្ត្រាលី​ប្រាប់​ទៅ ហ៊ុន សែន ឲ្យ​ដក​ការ​គំរាម​វាយ​បាតុករ

សមាជិកសភា​អូស្ត្រាលី ស្នើ​ឲ្យ​រដ្ឋាភិបាល​អូស្ត្រាលី ប្រាប់​ទៅ ហ៊ុន សែន ឲ្យ​ដក​ការ​គំរាម​វាយ​បាតុករ​ទៅ​វិញ​ជាបន្ទាន់ ព្រោះ​ការ​គំរាមកំហែង​បែប​នេះ គឺ​បំពាន​សិទ្ធិសេរីភាព និង​លទ្ធិប្រជាធិបតេយ្យ ដែល​ប្រទេស​អូស្ត្រាលី ប្រកាន់​ខ្ជាប់​ម៉ឺងម៉ាត់​បំផុត។

សមាជិកសភា​អូស្ត្រាលី ពី​ខាង​គណបក្ស​ពលករ លោក ម៉ាក បាត់លើរ៍ (Mark Butler) បាន​ថ្លែង​សារ​ធ្ងន់ៗ តប​ទៅ​នឹង​ ហ៊ុន សែន ដែល​បាន​គំរាម​ប្រព្រឹត្ត​អំពើ​ហិង្សា​ទៅ​លើ​អ្នក​តវ៉ា​ខ្មែរ​នៅ​អូស្ត្រាលី។ ថ្លែង​នៅ​ក្នុង​សារ​តាមរយៈ​វីដេអូ​ឃ្លិប ដែល​ផ្សាយ​តាម​ទំព័រ​ហ្វេសប៊ុក របស់​លោក​នៅ​ថ្ងៃ​សុក្រ ទី​២៣ ខែ​កុម្ភៈ​នេះ លោក ម៉ាក បាត់លើរ៍ ពន្យល់​ប្រាប់​ទៅ​ ហ៊ុន សែន ឲ្យ​យល់​អំពី​លទ្ធិប្រជាធិបតេយ្យ​នៅ​ប្រទេស​អូស្ត្រាលី ដោយ​លោក​បញ្ជាក់​ថា ពលរដ្ឋ​ខ្មែរ-​អូស្ត្រាលី មាន​សិទ្ធិ​ធ្វើ​បាតុកម្ម​ដោយ​សន្តិភាព ដោយ​គ្មាន​ការ​គំរាមកំហែង​ណា​មួយ​បាន​ឡើយ។