 |
| ពលរដ្ឋមកពីខេត្តកោះកុង និងកំពង់ស្ពឺតវ៉ាទាក់ទងនឹងបញ្ហាដីធ្លីនៅមុខក្រសួងរៀបចំដែនដី នគរូបនីយកម្ម និងសំណង់កាលពីម្សិលមិញ។ ស្រេង ម៉េងស្រ៊ុន |
សុទ្ធ គឹមសឿន | ភ្នំពេញ ប៉ុស្ដិ៍ Publication date 03 May 2018 | 09:11 ICT
កោះកុង/កំពង់ស្ពឺៈ ប្រជាពលរដ្ឋមកពី ២ ខេត្តប្រមាណជិត ៤០០ នាក់ និងតំណាងឲ្យជិត ៤០០ គ្រួសារក្នុងក្រុមទី ២ ដែលមិនទាន់ទទួលបានដំណោះស្រាយពីរដ្ឋ ក្រោយពីទទួលរងគ្រោះដោយសារក្រុមហ៊ុនស្ករអំពៅរបស់ឧកញ៉ា លី យ៉ុងផាត់ សមាជិកព្រឹទ្ធសភានៃគណបក្សប្រជាជនកម្ពុជាពីម្សិលមិញ បានចេញមកតវ៉ាទាមទាររកដំណោះស្រាយនៅក្រសួងរៀបចំដែនដី ដោយសុំឲ្យស្ថាប័នពាក់ព័ន្ធជួយដោះស្រាយជម្លោះដីធ្លីរុំារ៉ៃរបស់ពួកគេ។
ការចេញទាមទាររកដំណោះស្រាយដីធ្លីជាមួយក្រុមហ៊ុនស្ករអំពៅនៅខេត្តកោះកុងនេះ ដោយសារអាជ្ញាធរក្នុងខេត្តកោះកុងក៏ដូចជាអាជ្ញាធរខេត្តកំពង់ស្ពឺ និងក្រសួងរៀបចំដែនដី នគរូបនីយកម្ម និងសំណង់មិនបានដោះស្រាយជម្លោះដីធ្លីជូនពួកគាត់ដូចពលរដ្ឋមួយក្រុមទៀតដែលដឹកនាំដោយអ្នកស្រី ផាវ ញ៉ើង ដែលតែងតែចេញតវ៉ាយ៉ាងសកម្មកន្លងមក។
តំណាងពលរដ្ឋរងគ្រោះដីធ្លីគឺអ្នកស្រី ជឹម ស្រីធួន រៀបរាប់ថាពួកគាត់មានការខកចិត្តយ៉ាងខ្លាំងដែលក្រសួងដែនដីមិនបានដោះស្រាយដីធ្លីជូនឲ្យចប់សព្វគ្រប់ដូចពលរដ្ឋក្រុមទី ១ ។ ដំបូងឡើយ ទំនាស់ដីធ្លីរ៉ាំរ៉ៃដែលបានអូសបន្លាយពេលជាង ១០ ឆ្នាំមកនេះគឺបានប៉ះពាល់លើប្រជាពលរដ្ឋចំនួន ៥៣៧ គ្រួសារដែលរស់នៅក្នុងភូមិចំនួន ៩ នៃឃុំចំនួន ៤ គឺមានឃុំជីខក្រោម ឃុំជីខលើ ឃុំដងពែង និងឃុំកណ្ដោល ស្ថិតក្នុងស្រុកចំនួន ២ គឺស្រុកស្រែអំបិល និងបទុមសាគរ ខេត្តកោះកុង។
អ្នកស្រីបញ្ជាក់ថា៖ «ភាគីក្រសួងបានអនុញ្ញាតឲ្យពួកខ្ញុំចំនួន ១០ នាក់ចូលទៅជួបហើយជជែកគ្នា ប៉ុន្ដែមិនទាន់ត្រូវរ៉ូវគ្នាទេព្រោះពេលហ្នឹងពួកខ្ញុំបានលើកសំណើ ១ ចំណុច គឺពួកខ្ញុំចង់បានសំណងដូចក្រុមអ្នកស្រី ផាវ ញ៉ើង គឺដី ៣ ហិកតា និងលុយ ២៥០០ ដុល្លារ ប៉ុន្ដែភាគីក្រសួងមិនព្រមទេ ហើយគេថា គេសុំពេលពិភាក្សាគ្នាសិន ហើយខ្ញុំសួរពេលណាទើបដឹង ហើយគេថាចាំបោះឆ្នោតហើយ»។
អ្នកស្រីបន្តថាទំនាស់ដីធ្លីនេះគឺមានវិវាទជាមួយភាគីក្រុមហ៊ុនលោកឧកញ៉ា ហ៊ុយ ហេង និងក្រុមហ៊ុនឈ្មោះ កោះកុង ស៊ូហ្គើ (Kohkong Sugar) និងក្រុមហ៊ុន កោះកុង ផ្លេនថេសិន (Kohkong Plantation) របស់អ្នកវិនិយោគទុនថៃ ដែលបានទិញភាគហ៊ុនពីលោកឧកញ៉ា លី យ៉ុងផាត់ សមាជិកព្រឹទ្ធសភាគណបក្សប្រជាជនកម្ពុជា។
ពលរដ្ឋម្នាក់ទៀតគឺលោក ហៀង សុខុម និយាយថាដើមឆ្នាំ ២០១៦ ប្រជាពលរដ្ឋបានបែកគ្នាជា ២ ក្រុម។ ក្រុមទី ២ នេះគឺបានលង់ជឿសម្ដីលួងលោមរបស់អាជ្ញាធរឃុំ-ស្រុក និងអាជ្ញាធរខេត្តថាកុំឲ្យពួកគាត់តវ៉ាសកម្មដូចក្រុមទី ១ ពោលគឺរង់ចាំឲ្យអាជ្ញាធរដោះស្រាយតាមសម្រួល ប៉ុន្តែទីបំផុតវិវាទដីធ្លីរ៉ាំរ៉ៃរបស់ពួកគាត់ក្រុមទី ២ នេះត្រូវបានរដ្ឋាភិបាល និងក្រុមហ៊ុនស្ករអំពៅមើលរំលងមិនបានដោះស្រាយដូចក្រុមទី ១ ដែលតែងតែចេញតវ៉ានោះឡើយ។
លោក សុខុម បន្តថា៖ «ខ្ញុំសំណូមពរទៅថ្នាក់ដឹកនាំទាំងអស់ សុំជួយដោះស្រាយឲ្យពលរដ្ឋបានគ្រប់ៗគ្នាផង។ កន្លងមកដែលពួកយើងមិនបានតវ៉ា ព្រោះស្ដាប់តាមអាជ្ញាធរមិនឲ្យតវ៉ា»។
ករណីមួយទៀតលោក អ៊ឹម ចេម តំណាងប្រជាពលរដ្ឋចំនួន ២០ គ្រួសាររស់នៅភូមិដីឆ្នាំង ឃុំហោងសំណំ ស្រុកឱរ៉ាល់ ខេត្តកំពង់ស្ពឺដែលបាននាំគ្នាមកក្រសួងរៀបចំដែនដីនគរូបនីយកម្ម និងសំណង់ផងដែរបានលើកឡើងថា ក្រុមរបស់លោកមានដីចំនួន ៦៥ ហិកតាកំពុងមានទំនាស់ជាមួយក្រុមហ៊ុនចិនឈ្មោះហ្វ័ជូណា វិនិយោគលើដំណាំស្ករអំពៅ និងកៅស៊ូដែលរំលោភយកកាលពីឆ្នាំ ២០១០ ប៉ុន្ដែមិនទាន់បានដោះស្រាយរហូតមកដល់បច្ចុប្បន្ន។
លោកបញ្ជាក់ថា៖ «ក្រុមហ៊ុនហ្នឹងបានឈូសឆាយ និងរំលោភយកដីពួកខ្ញុំ ហើយគ្មានដំណោះស្រាយអ្វីទេ។ លើសពីនេះក្រុមការងារក្រសួងបានបដិសេធមិនឲ្យពលរដ្ឋចុះបញ្ជីដីធ្លីដែលបាត់បង់ទេ ទើបពួកខ្ញុំខំប្រឹងធ្វើដំណើរមកដល់ក្រសួងផ្ទាល់តែម្ដង ហើយខ្ញុំសង្ឃឹមថាថ្នាក់ដឹកនាំដែលពាក់ព័ន្ធជួយដោះស្រាយពួកខ្ញុំឲ្យបានឆាប់»។
កាលពីថ្ងៃទី ២២ ខែមីនាក្រសួងរៀបចំដែនដី នគរូបនីយកម្ម និងសំណង់ ក្រុមហ៊ុន និងប្រជាពលរដ្ឋបានព្រមព្រៀងគ្នាបញ្ចប់ករណីវិវាទនេះជាស្ថាពរដោយក្រុមប្រជាពលរដ្ឋ ១៧៥ គ្រួសារក្នុងក្រុមទី ១ យល់ព្រមទទួលយកដំណោះស្រាយជាដីទំហំ ៣ ហិកតានៅលើទីតាំងថ្មី និងថវិកាចំនួន ២៥០០ ដុល្លារក្នុងមួយគ្រួសារ។ ក្រុមប្រជាពលរដ្ឋ ២០០ គ្រួសារផ្សេងទៀតយល់ព្រមទទួលយកដំណោះស្រាយជាដីទំហំ ១,៥ ហិកតាក្នុងមួយគ្រួសារនៅលើទីតាំងចាស់ ប៉ុន្តែមិនទទួលបានលុយទេ។
ទន្ទឹមគ្នានេះភាគីក្រុមហ៊ុនយល់ព្រមឲ្យរដ្ឋកាត់ដីទំហំ «៨២៥ ហិកតា» ស្ថិតក្នុងឃុំជីខលើ ស្រុកស្រែអំបិល ខេត្តកោះកុងចេញពីដីសម្បទានសេដ្ឋកិច្ចដែលក្រុមហ៊ុនបានទទួលសិទ្ធិវិនិយោគពីរាជរដ្ឋាភិបាល ដើម្បីឲ្យរដ្ឋធ្វើប្រទានកម្មជាកម្មសិទ្ធិជូនប្រជាពលរដ្ឋខាងលើ និងផ្ដល់ថវិកាតាមចំនួនខាងលើជូនក្រុមប្រជាពលរដ្ឋ ១៧៥ គ្រួសារតាមសំណូមពរ។
លោកស្រី ភូថង មិថុនា អភិបាលខេត្តកោះកុង និងអនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ លោក ទេព ធន ដែលចេញមុខដោះស្រាយជម្លោះដីធ្លីខាងលើកាលពីម្សិលមិញមិនទាន់អាចទាក់ទងសុំអត្ថាធិប្បាយបានទេ។ ប៉ុន្ដែលោក ទេព ធន បាននិយាយប្រាប់ប្រជាពលរដ្ឋក្នុងអំឡុងពេលជួបគ្នានោះថាលោកសុំពេលពិចារណាមួយរយៈរហូតដល់បោះឆ្នោតចប់សិន ព្រោះលោកបានចរចាជាមួយពលរដ្ឋមិនទាន់ត្រូវគ្នានៅឡើយ។
លោក អំ សំអាត ប្រធានគ្រប់គ្រងផ្នែកអង្កេតការណ៍នៃអង្គការលីកាដូ (Licadho) ថ្លែងថា ពលរដ្ឋទាំងនេះជាជនរងគ្រោះពីគម្រោងដីសម្បទានសេដ្ឋកិច្ចស្ករអំពៅដូចគ្នា ដូច្នេះដើម្បីដោះស្រាយជម្លោះដីធ្លីនេះចប់ជាស្ថាពរ គឺក្រសួងដែនដីត្រូវខិតខំដោះស្រាយផ្ដល់ជាសំណង និងដីដល់ពួកគាត់ទាំងនេះ។
លោកបញ្ជាក់ថា៖ «យើងក៏ទទួលស្គាល់ថាឯកឧត្តម ជា សុផារ៉ា ពិតជាខិតខំដោះស្រាយជូនពលរដ្ឋបានច្រើនគ្រួសារមកហើយ ព្រោះដីមានទំនាស់នេះវារ៉ាំរ៉ៃជាច្រើនឆ្នាំ អ៊ីចឹងសង្ឃឹមថាឯកឧត្តមនឹងបន្តដោះស្រាយជូនពួកគាត់ទៀតដោយមិនចាំបាច់ពលរដ្ឋឡើងមកតវ៉ា ទើបដោះស្រាយនោះទេ»។
ប្រជាពលរដ្ឋរងគ្រោះដីធ្លីទាំងនេះអះអាងថាពួកគាត់ខំអត់ធ្មត់ ដើម្បីរង់ចាំដំណោះស្រាយជាយូរណាស់មកហើយ ប៉ុន្តែប្រសិនបើអាជ្ញាធរព្រងើយកន្តើយមិនដោះស្រាយទៀតនោះគឺពួកគាត់គ្មានជម្រើសអ្វីក្រៅពីការចេញតវ៉ានោះឡើយ។
Aucun commentaire:
Enregistrer un commentaire