.png)
 |
| ប្រធានសភាអាមេរិក លោក ចន ប៊ូ នើរ (ឆ្វេង) ដើរចុះពីវិមានសភាជាមួយប្រធានាធិបិតីអាមេរិក លោក បារ៉ាក់ អូបាម៉ា កាលពី ខែ មីនា។ AFP |
ក្រុងវ៉ាស៊ីនតោនៈ ក្រុមអ្នកតាក់តែងច្បាប់អាមេរិក បានបោះឆ្នោតក្នុងសំឡេងច្រើនលើសលប់ពីថ្ងៃចន្ទដើម្បីជំរុញឲ្យប្រធានាធិបតី លោក បារ៉ាក់ អូបាម៉ា ផ្ដល់អាវុធប្រល័យជីវិតទៅឲ្យប្រទេសអ៊ុយក្រែនដើម្បីការពារខ្លួនឯងផ្ទាល់ប្រឆាំងនឹង «ការឈ្លានពាន» ពីសំណាក់ប្រទេសរុស្ស៊ី។
សភាតំណាងរាស្ត្រអាមេរិកបានអនុម័តសេចក្តីសម្រេចចិត្តនោះក្នុងសំឡេងឆ្នោត ៣៤៨ ទល់នឹង ៤៨ ពីរបក្សដ៏ទូលំទូលាយ ដោយបង្កើនសម្ពាធបន្ថែមទៀតលើរដ្ឋការរបស់លោក អូបាម៉ា ឲ្យបញ្ចប់ការពន្យារពេលរបស់ខ្លួនក្នុងការផ្ដល់អាវុធ និងបរិក្ខារយោធាធុនធ្ងន់ជាច្រើនទៀតទៅឲ្យកម្លាំងក្រុងកៀវ។
សភា បាននិយាយក្នុងសំឡេងបង្រួបបង្រួមដ៏ទូលំទូលាយមួយលើបញ្ហានេះ ដោយក្រុមអ្នកតាក់តែងច្បាប់ជាច្រើនបាននិយាយអំពីការបំពាក់អាវុធដល់កម្លាំងអ៊ុយក្រែនផ្ទាល់ ប៉ុន្តែមានការបែកបាក់គ្នាជាច្រើនក្នុងរដ្ឋការរបស់លោក អូបាម៉ា។
បន្ទាប់ពីការរំលោភបំពានបទឈប់បាញ់ដែលគេរាយការណ៍រវាងកម្លាំងរដ្ឋាភិបាលរបស់អ៊ុយក្រែន និងក្រុមឧទ្ទាមទាមទារបំបែកខ្លួនគាំទ្ររុស្ស៊ីក្នុងខែនេះសេតវិមានបានប្រកាសថា ខ្លួននឹងផ្តល់កញ្ចប់ថវិកាចំនួន ៧៥ លានដុល្លារ សម្រាប់បរិក្ខារការពារជាតិដែលមិនប្រល័យជីវិតដល់ពលរដ្ឋអ៊ុយក្រែន។
ប៉ុន្តែប្រមុខសេនាធិការចម្រុះ ឧត្តមសេនីយ៍ ម៉ារទីន ដេមស៊ី បានប្រាប់សវនាការគណៈកម្មាធិការសេវាកម្មប្រដាប់អាវុធព្រឹទ្ធសភាមួយថា លោក នឹង«ពិចារណាដ៏ពេញលេញនូវការផ្ដល់ជំនួយប្រល័យជីវិត» ខណៈរដ្ឋមន្ត្រីការពារជាតិ លោក Ashton Carter បាននិយាយនៅឯសវនាការបញ្ជាក់របស់លោកថា លោកក៏ «លម្អៀង» ទិសដៅនោះដែរ។
វិធានការពីថ្ងៃចន្ទជំរុញឲ្យលោក អូបាម៉ា ផ្ដល់ឲ្យអ៊ុយក្រែននូវ «ប្រព័ន្ធសព្វាវុធការពារជាតិប្រល័យជីវិត» ដែលនឹងពង្រឹងលទ្ធភាពរបស់អ៊ុយក្រែនដើម្បី «ការពារទឹកដីជាអធិបតេយ្យរបស់ខ្លួនពីការឈ្លានពានទាំងខ្លួនគ្មានកំហុស និងនៅតែបន្តពីសហព័ន្ធរុស្ស៊ី»។
ប្រធានសភាលោក ចន ប៊ូនើរ បានពិពណ៌នាការបោះឆ្នោតនេះជាការអំពាវនាវមួយឲ្យមានវិធានការ និងបាននិយាយថា សភាគាំទ្រជាទូទៅឲ្យមានជំនួយយោធាថែមទៀត។ «បើគ្មានវិធានការពីរដ្ឋការនេះទេ ការឈ្លានពានពីរុស្ស៊ីនឹងបន្តមិនឈប់»៕ MN
