ក្រុងហ្សឺណែវ: អ្នកជំនាញការផ្នែកសិទ្ធិមនុស្សជាន់ខ្ពស់របស់អង្គការសហប្រជាជាតិ (UN) បានព្រមានកាលពីថ្ងៃចន្ទថាការបង្ក្រាបពីរបបយោធាលើក្រុមជនជាតិភាគតិចរ៉ូហ៊ីងយ៉ានៅមីយ៉ាន់ម៉ាមាន «លក្ខណៈ បង្កប់ធាតុនៃអំពើប្រល័យពូជសាសន៍» និងបានស្នើសុំឲ្យរដ្ឋាភិបាលមានការទទួលខុសត្រូវចំពោះបញ្ហានេះ។
ក្រុមជនមូស្លីមរ៉ូហ៊ីងយ៉ា ជិត ៧០ ម៉ឺននាក់ បានរត់ភៀសខ្លួនពីរដ្ឋរ៉ាក់ឃីនភាគខាងជើងឆ្លងដែនទៅកាន់ បង់ក្លាដែស ចាប់តាំងពី មីយ៉ាន់ម៉ា បានបើកយុទ្ធនាការបង្ក្រាបដ៏សាហាវមួយលើក្រុមឧទ្ទាម កាលពី ៦ ខែកន្លងទៅ ស្របពេលមានព័ត៌មាននានាពាក់ព័ន្ធការបង្កអគ្គិភ័យដុតបំផ្លាញផ្ទះសម្បែង ឃាតកម្ម និង ការចាប់រំលោភផ្លូវភេទពីសំណាក់ក្រុមទាហាននិងក្រុមប្រជាការពារនៅក្នុងមីយ៉ាន់ម៉ា ដែលពលរដ្ឋភាគច្រើន ជាអ្នកកាន់ព្រះពុទ្ធសាសនានេះ។
មីយ៉ាន់ម៉ា បានបដិសេធយ៉ាងដាច់អហង្ការនូវការចោទប្រកាន់នានាពីអាមេរិក និង អ.ស.ប. ពីបទបោសសម្អាតពូជសាសន៍ ដោយបានលើកឡើងថា កងទ័ពរដ្ឋាភិបាលគ្រាន់តែឆ្លើយតបទៅនឹង ការវាយប្រហារពីយោធារំដោះជាតិអារ៉ាកាន់ រ៉ូហ៊ីងយ៉ា អំឡុងចុងខែសីហា ឆ្នាំមុន។
ប៉ុន្តែ កាលពីថ្ងៃចន្ទ អ្នករាយការណ៍ពិសេសរបស់អ.ស.ប.(UN) ប្រចាំនៅមីយ៉ាន់ម៉ា លោកស្រី Yanghee Lee បានលើកឡើងថា ពាក្យសម្តីដែលប្រើប្រាស់មិនសូវមានទម្ងន់ប៉ុន្មានទេ។
លោកស្រីថ្លែងប្រាប់ក្រុមប្រឹក្សាសិទ្ធិមនុស្សនៃអ.ស.ប.ថា៖ «ខ្ញុំកាន់តែមានជំនឿថា បទឧក្រិដ្ឋប្រព្រឹត្តធ្វើឡើងនេះ មានចរិតជាអំពើប្រល័យពូជសាសន៍ និងសុំឲ្យរដ្ឋាភិបាលមានការទទួលខុសត្រូវចំពោះបញ្ហានេះ៕
AFP | Publication date 14 March 2018 | 13:55 ICT
Aucun commentaire:
Enregistrer un commentaire